Santiago de Compostela, 31 de outubro de 2023.- O SERGAS e a ACIS participan no proxecto CIRCE (Joint Action Transfer of Best Practices in Primary Care) que ten por finalidade transferir e implantar boas prácticas levadas a cabo na atención primaria, entre elas, a plataforma de teleasistencia domiciliaria para seguimento e contacto entre doentes crónicos e profesionais sanitarios (TELEA).

 

Ao longo do mes de outubro, no marco deste proxecto celebráronse webinarios entre os propietarios das boas prácticas obxecto de transferencia e as súas rexións implementadoras. Galicia protagonizou a sexta sesión destes webinarios.

 

A xornada, celebrada este luns 30 de outubro, contou coa participación de representantes do SERGAS e da ACIS; así como das rexións italianas de Piemonte, Teramo e Modena, e a rexión sueca de Norbotten, que implementarán o sistema de telemedicina galego nos seus respectivos territorios.

 

A sesión comezou cun breve resumo das actividades que se levarán a cabo nos próximos meses no paquete de traballo 5 do proxecto (Metodoloxía para o proceso de transferencia e avaliación de necesidades) e no paquete 6 (Proceso de transferencia e piloto de aplicación), e que irán encamiñadas a dotar aos pilotos de implementación das ferramentas necesarias para iniciar o proceso de transferencia das boas prácticas.

 

A continuación, Marta Álvarez Vázquez, enfermeira e técnica do Servizo de Integración Asistencial do SERGAS tomou a palabra para presentar TELEA. Durante a súa intervención resaltou as características do sistema sanitario galego e a nosa demografía, os elementos claves da telemonitorización, os actores implicados e resultados positivos obtidos, que redundaron no empoderamento do paciente e a mellora da súa calidade de vida.

 

Despois, durante a quenda de debate, os pilotos de implementación puideron expor as súas dúbidas, solicitar información, expoñer as barreiras que poderían dificultar a adopción desta boa práctica nos seus territorios, así como expor os pasos e actividades que necesitarán desenvolver para adaptar e implantar o sistema de telemonitorización nas súas rexións.

 

Este webinario permitiu aos implementadores coñecer en maior profundidade o modelo de telemedicina galego, analizar as similitudes e elementos diferenciais respecto a os seus sistemas sanitarios, así como expoñer as necesidades e actividades que precisarán levar a cabo para poder implementar con éxito o modelo de telemonitorización de Galicia nas súas respectivas rexións.